कलैया, बारा — आगामी निर्वाचनलाई लक्षित गर्दै बारा क्षेत्र नम्बर ४ मा नेपाली कांग्रेसका प्रतिनिधिसभा सदस्य पदका उम्मेदवार श्यामबाबु गुप्ताले चुनावी घरदैलो कार्यक्रमलाई तीव्रता दिएका छन्।
गाउँ–टोलमै पुगेर मतदातासँग प्रत्यक्ष संवाद गर्दै गुप्ता अहिले छतवा, कैलानपुर, निमुवा, घोडासह र खेखारिया टोलमा सक्रिय रूपमा भेटघाटमा व्यस्त छन्। स्थानीय बासिन्दासँगको संवादमा उनले विकास, समृद्धि र लोकतन्त्रको सुदृढीकरणलाई आफ्नो मुख्य एजेन्डा बनाएका छन्।
मतदाताहरूलाई सम्बोधन गर्दै गुप्ताले पार्टीको चुनाव चिन्ह ‘रुख’मा मतदान गर्न आग्रह गरे। “रुख चिन्हमा मतदान गरी लोकतन्त्रलाई बलियो बनाऔँ र विकासको गतिलाई अगाडि बढाऔँ, जय नेपाल,” भन्दै उनले उत्साहका साथ अपिल गरे।
उनले निर्वाचित भएपछि क्षेत्रको पूर्वाधार विकास, शिक्षा, स्वास्थ्य र रोजगारीका अवसर विस्तारमा प्राथमिकता दिने प्रतिबद्धता पनि व्यक्त गरेका छन्।
नेपाली कांग्रेस बारा क्षेत्र नं. ४ मा चलिरहेको यो घरदैलो अभियानले स्थानीय तहमा पार्टीको गतिविधि थप चलायमान बनाएको देखिन्छ। गुप्ता एक युवा तथा समाजसेवी नेताका रूपमा चिनिन्छन्, जसले तरुण दलबाट आफ्नो राजनीतिक यात्रा सुरु गर्दै पार्टीको मूलधार राजनीतिमा सक्रिय भूमिका निर्वाह गर्दै आएका छन्।
स्थानीय मतदाताहरूले पनि उम्मेदवारसँग प्रत्यक्ष संवाद गर्ने अवसर पाएकोमा सन्तोष व्यक्त गर्दै विकासका एजेन्डा पूरा हुने अपेक्षा गरेका छन्।
