काठमाडौँ : त्रिभुवन अन्तर्राष्ट्रिय विमानस्थल मा सयौँ यात्रुहरू घण्टौँदेखि अलपत्र परेका छन्। बुद्ध एयर को काठमाडौँ–सिमरा उडान (१०:३० बजे) अनिश्चित बनेपछि यात्रुहरू अन्योल, आक्रोश र असहायताको अवस्थामा छन्।
हवाई यात्रा छिटो, सुरक्षित र भरपर्दो हुने विश्वासमा यात्रुहरूले विकल्प रोजे पनि व्यवस्थापनको कमजोरीका कारण उनीहरू पटक–पटक विमानस्थलमै थुनिन बाध्य भइरहेका छन्।
यसै उडानमार्फत सिमरा जान लागेका युवा नेता प्रवेज आलम अन्सारी बिहान ११ बजे हुने महत्वपूर्ण बैठकमा सहभागी हुनुपर्ने थियो। तर उडान अनिश्चित भएपछि उनीसहित सयौँ यात्रुहरू अझै विमानस्थलमै पर्खिरहेका छन्।
काठमाडौँबाट भद्रपुर, पोखरा, विराटनगरलगायत विभिन्न गन्तव्यका उडानहरू पनि प्रभावित हुँदा समस्या झन् बढेको छ। यात्रुहरूलाई न स्पष्ट सूचना दिइएको छ, न ढिलाइको कारणबारे आधिकारिक जानकारी।
यो समस्या नयाँ होइन—नेपालको हवाई सेवामा वर्षौँदेखि दोहोरिँदै आएको गम्भीर कमजोरी हो। तर संस्कृति, पर्यटन तथा नागरिक उड्डयन मन्त्रालय र सम्बन्धित नियामक निकायहरू यसप्रति मौन देखिँदा प्रश्न झन् गम्भीर बनेको छ।
ढिलाइ, अव्यवस्था र अस्पष्टताले यात्रुहरूमा आक्रोश मात्र होइन, नियामक निकाय र एयरलाइन्सबीचको पारदर्शितामाथि पनि शंका पैदा गरेको छ।
