भगवान् रामको जन्मोत्सव आज, देशभर श्रद्धापूर्वक रामनवमी मनाइँदै

जितपुर: असत्यमाथि सत्यको विजयको प्रतीक भगवान् श्री रामचन्द्रको जन्मजयन्तीका अवसरमा आज (शुक्रबार) देशभर रामनवमी पर्व श्रद्धा र भक्तिपूर्वक मनाइँदैछ। चैत्र शुक्ल नवमीका दिन मनाइने यस पर्वका अवसरमा सरकारले देशभर सार्वजनिक बिदा समेत दिएको छ।

पौराणिक मान्यता अनुसार त्रेतायुगमा अयोध्याका राजा दशरथ र महारानी कौसल्याको पुत्रका रूपमा आजकै दिन भगवान् रामको जन्म भएको थियो। उनलाई भगवान् विष्णुको सातौँ अवतारका रूपमा पूजा गरिन्छ। पुनर्वसु नक्षत्रमा जन्मिएका रामको कुण्डलीमा कर्कट लग्नसहित चन्द्रमा र बृहस्पतिको योग रहेको र सूर्य, मङ्गल, गुरु, शुक्र तथा शनि एकै स्थानमा रहेका दुर्लभ योग रहेको धर्मग्रन्थहरूमा उल्लेख छ। यही दिव्य योगमा जन्मिएका रामले अन्याय र अधर्मको अन्त्य गरी आदर्श ‘रामराज्य’ स्थापना गरेको विश्वास गरिन्छ।

नेपाल पञ्चाङ्ग निर्णायक विकास समितिका अनुसार रामनवमी पर्वले मानिसलाई मर्यादा, अनुशासन र आदर्श जीवनशैली अपनाउन प्रेरित गर्छ। धार्मिक ग्रन्थअनुसार चैत्र अष्टमी र नवमीमा विशेष पूजा, जप र ध्यान गरे मनोकामना पूरा हुने जनविश्वास छ। आजका दिन देवीको आराधनासँगै भगवान् रामको पूजा गर्दा ऐश्वर्य प्राप्त हुने मान्यता रहेको छ।

यस अवसरमा जनकपुर र अयोध्यामा विशेष चहलपहल देखिएको छ। भगवान् रामको ससुराली मानिने जनकपुरस्थित रामजानकी मन्दिरमा नेपाल र भारतबाट आएका हजारौँ श्रद्धालुहरूको भीड लागेको छ। साथै, विभिन्न स्थानमा रामलीला, भजन–कीर्तन तथा रामायण वाचनका कार्यक्रमहरू आयोजना भइरहेका छन्।

यस्तै, बारा र पर्सा जिल्लामा पनि रामनवमीका अवसरमा विविध धार्मिक तथा सांस्कृतिक कार्यक्रमहरू भव्य रूपमा सम्पन्न भइरहेका छन्।