कलैया : ग्यालेक्सी बिजनेस कलेज को आयोजनामा फुड फेस्टिवल भव्य र उत्साहपूर्ण वातावरणमा सम्पन्न भएको छ। कलेज परिसर विद्यार्थीहरूको ऊर्जा, रौनक र सिर्जनशीलताले भरिएको थियो।
कार्यक्रमको उद्घाटन कलेजकी संस्थापक प्रिन्सिपल नम्रता रिसाल ले रिबन काटेर गर्नुभएको थियो। उद्घाटन समारोहमा बोल्दै उनले यस्ता कार्यक्रमहरूले विद्यार्थीहरूमा नेतृत्व क्षमता, व्यवस्थापन सीप र उद्यमशील सोच विकास गर्न महत्वपूर्ण भूमिका खेल्ने बताइन्।
विद्यार्थीहरूको सक्रिय सहभागितामा आयोजित महोत्सवमा परम्परागत नेपाली परिकारदेखि लोकप्रिय अन्तर्राष्ट्रिय खानासम्मका विभिन्न स्वादहरू प्रस्तुत गरिएको थियो। प्रत्येक स्टललाई आकर्षक रूपमा सजाइएको थियो, जसले कार्यक्रमलाई अझै जीवन्त बनाएको थियो।
विशेष कुरा के थियो भने, सबै परिकार विद्यार्थीहरूले आफ्नै योजना, लगानी र व्यवस्थापनमा तयार गरी बिक्री गरेका थिए। यसले उनीहरूको व्यवसायिक सोच, टोली भावना र व्यवहारिक सिकाइलाई प्रत्यक्ष रूपमा प्रस्तुत गरेको देखिन्थ्यो।
कार्यक्रम केवल खानामा सीमित रहेन, हाँसो–खुसी, रमाइलो र मित्रतापूर्ण वातावरणले कलेज परिसरलाई उत्सवमय बनाएको थियो। कार्यक्रममा विद्यार्थी, शिक्षक तथा अभिभावकहरूको उल्लेखनीय सहभागिता रहेको थियो।
कार्यक्रम सफल बनाउन योगदान पुर्याउने सम्पूर्ण विद्यार्थी, प्राध्यापक, व्यवस्थापन टोली तथा आयोजकहरूलाई कलेज प्रशासनले धन्यवाद व्यक्त गरेको छ।
फुड फेस्टिवल २०८२ ले कलेजमा सहकार्य, एकता र सिर्जनशीलताको सन्देश फैलाउँदै सहभागी सबैका लागि अविस्मरणीय अनुभव बनेको आयोजकले जनाएको छ।
