जीतपुर : जीतपुर–सिमरा उपमहानगरपालिका मा बारा निर्वाचन क्षेत्र नम्बर ४ का नेकपा एमाले उम्मेदवार किसान श्रेष्ठ ले आफ्नो चुनावी अभियानलाई तीव्र बनाएका छन्।
नेपाल कम्युनिष्ट पार्टी (एमाले) को तर्फबाट सञ्चालन भइरहेको अभियानअन्तर्गत श्रेष्ठले दोस्रो दिन वडा नम्बर २१ र २२ मा घरदैलो तथा भेटघाट कार्यक्रम सम्पन्न गरेका हुन्। कार्यक्रममा स्थानीयको उल्लेखनीय सहभागिता देखिएको थियो।
घरदैलोका क्रममा श्रेष्ठले मतदातासँग प्रत्यक्ष भेटघाट गर्दै आफ्नो विकास एजेन्डा प्रस्तुत गरेका छन्। उनले क्षेत्रको समग्र विकास, रोजगारी सिर्जना, कृषि आधुनिकीकरण, शिक्षा तथा स्वास्थ्य सेवाको स्तरोन्नति जस्ता विषयलाई प्राथमिकतामा राखेका छन्।
मतदाता भेटघाटका क्रममा युवादेखि ज्येष्ठ नागरिकसम्मको सक्रिय सहभागिताले चुनावी माहोललाई थप उत्साहपूर्ण बनाएको सहभागीहरूले बताएका छन्।
आगामी फागुन २१ गते हुने निर्वाचनलाई लक्षित गर्दै स्थानीयले सडक, खानेपानी, सिँचाइ, बेरोजगारी तथा पूर्वाधार विकासका विषयमा विशेष चासो व्यक्त गरेका छन्।
श्रेष्ठले जनताको सुझावलाई ध्यानमा राख्दै “स्थानीय आवश्यकता नै मेरो पहिलो प्राथमिकता हो” भन्ने प्रतिबद्धता व्यक्त गरेका छन्। उनको अभियान टोलीका अनुसार मतदातासँगको यो प्रत्यक्ष संवादले चुनावी माहोललाई अझ सशक्त बनाएको छ।
