करैयामाई, बारा : समाज निर्माणमा महत्वपूर्ण योगदान पुर्याउने व्यक्तिहरूलाई सम्मान गर्ने परम्परालाई निरन्तरता दिँदै करैयामाई गाउँपालिका–१ ले एक प्रेरणादायी कार्यक्रम आयोजना गरेको छ। शनिबार आयोजित उक्त कार्यक्रममा विभिन्न क्षेत्रबाट समाजमा उल्लेखनीय योगदान पुर्याएका ६५ जना व्यक्तित्वलाई विशेष सम्मान गरिएको हो।
खैरा गढीमाई मन्दिर परिसरमा सम्पन्न कार्यक्रममा गाउँपालिका अध्यक्ष शम्भुप्रसाद यादव प्रमुख अतिथिका रूपमा सहभागी भएका थिए। उनले सम्मानित व्यक्तिहरूलाई खादा र सम्मानपत्र प्रदान गर्दै उनीहरूको योगदानले समाजलाई सकारात्मक दिशातर्फ अघि बढाएको उल्लेख गरे। “समाज परिवर्तनका वास्तविक नायक यस्तै व्यक्तिहरू हुन्,” उनले भने।
वडा अध्यक्ष सोनालाल साहका अनुसार सम्मानित हुनेहरूमा शिक्षक सेवा, निजामति सेवा, नेपाल प्रहरी, सशस्त्र प्रहरीका सेवा निवृत्त तथा कार्यरत कर्मचारी, विभिन्न संघ–संस्थामा सक्रिय समाजसेवी तथा उच्च शिक्षा अध्ययन गरिरहेका प्रतिभाशाली युवाहरू समावेश छन्। “हाम्रो वडामा रहेका यस्ता व्यक्तित्वहरू समाजका प्रेरणाका स्रोत हुन्, उनीहरूको योगदानको कदर गर्न यो कार्यक्रम आयोजना गरिएको हो,” अध्यक्ष साहले बताए।
कार्यक्रमले स्थानीय स्तरमा काम गरिरहेका व्यक्तिहरूलाई प्रोत्साहन मात्र नभई आगामी पुस्तालाई पनि समाज सेवामा लाग्न प्रेरणा दिएको सहभागीहरूले बताएका छन्। सम्मानित व्यक्तिहरूले पनि आफूहरूको कामको मूल्यांकन भएकोमा खुशी व्यक्त गर्दै आगामी दिनमा अझ जिम्मेवार भएर समाज सेवामा लाग्ने प्रतिबद्धता जनाएका थिए।
वडा अध्यक्ष सोनालाल साहको अध्यक्षतामा सम्पन्न कार्यक्रममा वडासदस्य नेसारुल अंसारीले स्वागत मन्तव्य राखेका थिए भने कार्यक्रमको सञ्चालन सिताराम पासवानले गरेका थिए। कार्यक्रममा स्थानीय बासिन्दा, शिक्षक, विद्यार्थी तथा समाजसेवीहरूको उल्लेखनीय उपस्थिति रहेको थियो।
यस कार्यक्रमले करैयामाई गाउँपालिकामा सामाजिक सद्भाव, सम्मान र प्रेरणाको नयाँ सन्देश फैलाएको छ।
