कलैया । बालेन सरकार र सुरक्षा निकायको समर्थनमा जेनजी युथ अफ बाराका युवाहरूले कलैयामा सद्भावपूर्ण मोटरसाइकल र्याली निकाल्दै शान्ति, सुशासन र भ्रष्टाचारविरुद्ध जनचेतना अभिवृद्धि गर्ने प्रयास गरेका छन्।
आज दरबार रोडबाट सुरु भएको उक्त र्याली भरत चोक, बालमन्दिर, श्री ३ चन्द्र रोड, देवकोटा चोक, गुप्ता पेट्रोल पम्प हुँदै कलैया बजारसम्म नगर परिक्रमा गर्दै सम्पन्न भएको थियो। र्याली जेनजी युथ अफ बाराका संयोजक सौरभ पाण्डेको नेतृत्वमा आयोजना गरिएको थियो।
र्यालीमा सहभागी युवाहरूले स्थानीय बासिन्दासँग संवाद गर्दै विभिन्न नारासमेत लगाएका थिए। सहभागीहरूले जनतालाई सम्बोधन गर्दै “आराम विकेट गिर्दै डाम–डयाम, सरकार गर्ने कार्यले सुख पाउदै साराले” र “भ्रष्टाचारी जेलमा, बुढाहरू पाउदै आराम, नयाँ सरकारको काम” जस्ता नाराले उत्साहित गरेका थिए। यसले युवामा सरकारप्रतिको विश्वास र सामाजिक उत्तरदायित्वको भावना प्रवर्धन गर्ने उद्देश्य राखेको बताइएको छ।
जेनजी युथ अफ बाराका संयोजक सौरभ पाण्डेका अनुसार, र्याली केवल राजनीतिक उद्देश्यमा सीमित नभई देशमा भ्रष्टाचार फैलाउने र अराजकता सिर्जना गर्ने गतिविधिहरू विरुद्ध चेतना जगाउने उद्देश्यले आयोजना गरिएको हो। उनले सहभागी युवाहरूमार्फत सरकार र सुरक्षा निकायसँग सहकार्य गर्दै मनोबल बढाउन र समुदायमा सकारात्मक सन्देश प्रवाह गर्न आग्रह गरेका छन्।
उक्त र्यालीमा सौरभ चौगाई, सुरज साह, संजय चौधरी, प्रशान्त यादव, आनन्द गुप्ता, रोहित पटेल, अशोक पाण्डे, सुरज खनाल, लालु गुप्ता, एजाजुल अंसारी लगायतका जेनजी युथ अफ बाराका पदाधिकारी तथा स्थानीय युवाहरूको सहभागिता उल्लेखनीय रहेको थियो।
कार्यक्रमको मुख्य उद्देश्य स्थानीय युवालाई सकारात्मक क्रियाकलापमा संलग्न गराउनु, समाजमा सुशासन र शान्तिको महत्व बुझाउनु तथा भ्रष्टाचारविरुद्धको चेतना प्रवर्द्धन गर्नु रहेको आयोजकहरूले बताएका छन्।
स्थानीय बासिन्दा र सहभागीहरूले यस प्रकारको र्यालीले युवा चेतना र समाजिक जिम्मेवारीको भावना बढाउने विश्वास व्यक्त गरेका छन्। यसले केवल कलैया शहरमा मात्र नभई वरिपरिका क्षेत्रहरूमा पनि युवा सहभागिता र सामाजिक उत्तरदायित्वलाई उत्प्रेरित गर्ने अपेक्षा गरिएको छ।
