कलैया । नेपाल पत्रकार महासंघ मधेश प्रदेश समितिले रातोपाटी डटकमका रौतहट संवाददाता संजय मिश्रमाथि सामाजिक सञ्जालमार्फत भएको अपमानजनक व्यवहारप्रति गम्भीर ध्यानाकर्षण गरेको छ।
प्रेस स्वतन्त्रता र पत्रकारको पेशागत मर्यादामा प्रहार भएको भन्दै महासंघले यस्तो कार्य निन्दनीय भएको ठहर गरेको छ। महासंघका अनुसार, समाचारप्रति असहमति भए प्रचलित कानुनी प्रक्रियामार्फत समाधान खोज्न सकिने व्यवस्था भए पनि सामाजिक सञ्जालमार्फत व्यक्तिगत हमला गर्नु पूर्ण रूपमा गलत र अस्वीकार्य हो।
महासंघ मधेश प्रदेश समितिले घटनाको छानबिन गरी दोषीमाथि तत्काल कानुनी कारबाही गर्न सम्बन्धित निकायसँग माग गरेको छ। महासचिव शैलेन्द्र महतो ‘क्रान्ति’द्वारा हस्ताक्षरित विज्ञप्तिमा यस्तो कार्य निन्दनीय र पत्रकारितामाथि आक्रमणपूर्ण रहेको स्पष्ट उल्लेख गरिएको छ।
यस घटनाले सामाजिक सञ्जालको दुरुपयोग र पत्रकारमाथिको धम्कीबारे चेतना जगाउनुपर्ने आवश्यकता पनि देखाएको छ।
