जीतपुर, बाराः बाराको जीतपुरसिमरा उपमहानगरपालिका–४ औराहामा दाजुभाइबीचको पैतृक अंश विवाद चर्किँदै गएको छ। पारिवारिक सम्पत्तिको विषयमा सुरु भएको मतभेद अहिले हिंसा, धम्की र कानुनी झमेलासम्म पुगेको छ। पीडित पक्षले सार्वजनिक रूपमा न्यायको माग गर्न बाध्य भएको छ।
विवाद बढ्दै जाँदा हासिम र उनका परिवारमाथि बाहिरी व्यक्तिहरू मार्फत पटक–पटक कुटपिट र ज्यान मार्ने धम्की दिइएको जनाइएको छ। सुरक्षा अभावका कारण परिवारले आफ्नै घर छोडेर हाल सिमरा बजार क्षेत्रमा बसाइँ सरेको छ।
उनकी बहिनी शैरा खातुनले पनि अंश माग्दा दमन र धम्की भोग्नुपरेको गुनासो गरिन्। उनले इलाका प्रहरी कार्यालय सिमरामा दिएको उजुरीमा प्रभावकारी कारबाही नभएको आरोप लगाउँदै मुख्य आरोपित अझै नपक्राउ भएको बताइन्।
यसैबीच, मालपोत र वडा कार्यालयमार्फत गरिएको जमिन नामसारी प्रक्रियामा पनि शंका उठेको छ। पीडित पक्षले आफू उपस्थित नभएको अवस्थामा नामसारी कसरी भयो भन्ने विषयमा छानबिन र पारदर्शिताको माग गरेका छन्। हाल मुद्दा अदालतमा विचाराधीन छ र करिब ८२ कित्ता जग्गा रोक्का गरिएको छ।
तर, रोक्का हुँदाहुँदै पनि जमिन अन्य व्यक्तिको नाममा सार्ने प्रयास भइरहेको आरोप परिवारले लगाएको छ। यसले परिवारका सदस्यहरूलाई मानसिक र शारीरिक असुरक्षामा राखेको छ।
इलाका प्रहरी कार्यालय सिमराका प्रमुख, प्रहरी नायब उपरीक्षक दिलीप क्षेत्रीले घटनाको अनुसन्धान जारी रहेको जानकारी दिएका छन्। उनले भने, “चैत ८ गते घटनासँग सम्बन्धित दुई जनालाई पक्राउ गरिएको छ र उनीहरू हाल प्रहरी हिरासतमा छन्।”
पारिवारिक विवादले अंशसम्बन्धी कानुनी प्रक्रिया, सामाजिक विश्वास र सुरक्षाको प्रश्न उठाएको छ। पीडित परिवारले आवश्यक परे उच्च निकायसम्म पुगेर न्याय खोज्ने चेतावनी दिएको छ।
