निजगढस्थित जिल्ला ट्राफिक प्रहरी कार्यालयको सभाहलमा आयोजित कार्यक्रममा जिल्लाका विभिन्न स्थानमा कार्यरत ट्राफिक प्रहरी कर्मचारीहरूको सहभागिता रहेको थियो। सडकमा दैनिक रूपमा खटिने प्रहरी कर्मचारीलाई ट्राफिक व्यवस्थापनका क्रममा देखिने चुनौती, नियम कार्यान्वयन तथा दुर्घटना न्यूनीकरणका उपायबारे थप स्पष्ट र व्यवहारिक जानकारी दिने उद्देश्यले कार्यक्रम आयोजना गरिएको हो।
कार्यक्रममा जिल्ला ट्राफिक प्रहरी कार्यालय बाराका प्रमुख प्रहरी निरीक्षक हरि भट्टराईले ट्राफिक व्यवस्थापन तथा सडक सुरक्षाका विभिन्न पक्षबारे प्रहरी कर्मचारीलाई अभिमुखीकरण दिएका थिए। उनले सडकमा खटिँदा प्रहरी कर्मचारीले निर्वाह गर्नुपर्ने जिम्मेवारी, ट्राफिक नियमको प्रभावकारी कार्यान्वयन तथा सडक प्रयोगकर्तासँग गर्नुपर्ने व्यवहारका विषयमा समेत निर्देशन दिएका थिए।
प्रहरी निरीक्षक भट्टराईले ट्राफिक प्रहरीको भूमिका नियम उल्लंघन गर्ने चालकलाई कारबाही गर्नेमा मात्र सीमित नरहेको उल्लेख गर्दै दुर्घटना हुन नदिन पूर्वसावधानी अपनाउने, चालक तथा यात्रुलाई सचेत गराउने र सडक प्रयोगकर्तामा ट्राफिक अनुशासनको भावना विकास गराउने कामलाई पनि प्राथमिकता दिनुपर्नेमा जोड दिएका थिए।
अभिमुखीकरणका क्रममा तालुक कार्यालयबाट जारी भएका विभिन्न नीति, निर्देशन तथा कार्यसम्पादनसँग सम्बन्धित विषयहरूबारे समेत प्रहरी कर्मचारीलाई जानकारी गराइएको थियो। ट्राफिक नियम कार्यान्वयन गर्दा अपनाउनुपर्ने प्रक्रिया, सडकमा देखिने सम्भावित जोखिम पहिचान, दुर्घटना न्यूनीकरणका उपाय तथा सवारी व्यवस्थापनलाई व्यवस्थित बनाउने विषयमा छलफल गरिएको थियो।
त्यसैगरी, चालक, यात्रु, पैदलयात्री तथा अन्य सडक प्रयोगकर्तालाई ट्राफिक नियमबारे जानकारी गराउने र सचेतना फैलाउने प्रभावकारी उपायहरूका विषयमा समेत कार्यक्रममा चर्चा गरिएको थियो। सडक सुरक्षाका लागि प्रहरी र नागरिकबीचको सहकार्य आवश्यक रहेको भन्दै जनचेतनामूलक कार्यक्रमलाई थप प्रभावकारी बनाउने विषयमा जोड दिइएको थियो।
कार्यक्रममा TVRS सम्बन्धी अनुशिक्षण समेत प्रदान गरिएको जिल्ला ट्राफिक प्रहरी कार्यालय बाराले जनाएको छ। प्रहरी कर्मचारीलाई प्रविधि तथा प्रणालीसँग सम्बन्धित आवश्यक जानकारी दिँदै दैनिक कार्यसम्पादनमा त्यसको प्रभावकारी प्रयोगका विषयमा समेत प्रशिक्षण दिइएको थियो।
प्रहरी निरीक्षक भट्टराईले जिल्लामा बढ्दो सवारी चाप र सडकमा देखिने विभिन्न जोखिमका कारण दुर्घटना न्यूनीकरणलाई प्राथमिकतामा राख्नुपर्ने बताए। उनका अनुसार दुर्घटना रोक्न प्रहरीको सक्रियता मात्रै पर्याप्त नहुने भएकाले चालकले ट्राफिक नियम पालना गर्ने, यात्रुले सुरक्षित यात्रा गर्ने, पैदलयात्रीले सडक अनुशासन अपनाउने र सबै सडक प्रयोगकर्ता जिम्मेवार बन्ने वातावरण निर्माण गर्न आवश्यक छ।
उनले जिल्लाका विभिन्न स्थानमा ट्राफिक नियम, सडक सुरक्षा तथा दुर्घटना न्यूनीकरणसम्बन्धी जनचेतनामूलक कार्यक्रमलाई निरन्तरता दिने जानकारीसमेत दिएका थिए।
सवारी साधनको संख्या र सडकमा हुने आवागमन बढ्दै जाँदा दुर्घटनाको जोखिमसमेत बढिरहेको अवस्थामा ट्राफिक प्रहरीलाई समय–समयमा अभिमुखीकरण तथा अनुशिक्षण दिनुले उनीहरूको कार्यसम्पादनलाई थप प्रभावकारी बनाउने अपेक्षा गरिएको छ।
कार्यक्रमले सडकमा खटिने ट्राफिक प्रहरीलाई नियम कार्यान्वयनसँगै दुर्घटना रोकथाम, नागरिकमैत्री सेवा र सडक सुरक्षा सचेतना विस्तारमा थप जिम्मेवार भएर काम गर्न प्रेरित गरेको जिल्ला ट्राफिक प्रहरी कार्यालयले जनाएको छ।
.gif)
