बारा (निजगढ): आसन्न प्रतिनिधिसभा निर्वाचनका लागि बारा क्षेत्र नं. १ बाट नेपाली कांग्रेसले केन्द्रीय सदस्य शम्भु बहादुर बुढाथोकीलाई उम्मेदवार बनाएको छ। नेपाली कांग्रेसको केन्द्रीय कार्यालयले बुढाथोकीलाई औपचारिक रूपमा उम्मेदवारीको टिकट प्रदान गरेको हो।
लामो समयदेखि राजनीतिमा सक्रिय रहँदै आएका बुढाथोकी बारा जिल्लामा एक चर्चित र अनुभवी नेताका रूपमा परिचित छन्। संगठन निर्माणदेखि जनतासँग प्रत्यक्ष सम्पर्कमा रहँदै आएका उनी पार्टीभित्र प्रभावशाली नेतामध्ये एक मानिन्छन्। विशेषगरी निजगढ क्षेत्रलाई आफ्नो राजनीतिक आधार बनाएका बुढाथोकी स्थानीय तहदेखि केन्द्रसम्म परिचित व्यक्तित्व हुन्।
बुढाथोकी यसअघि पनि निर्वाचनमा प्रतिस्पर्धा गरिसकेका नेता हुन्। उनले २०६४ सालको पहिलो संविधानसभा निर्वाचनमा नेपाली कांग्रेसको तर्फबाट उम्मेदवारी दिएका थिए। उक्त निर्वाचनमा तत्कालीन नेकपा एमालेका नेता पुरुषोत्तम पौडेलसँग उनी झिनो मतान्तरले पराजित भएका थिए। सो निर्वाचन परिणामले बारा क्षेत्र नं. १ लाई राजनीतिक रूपमा संवेदनशील र प्रतिस्पर्धात्मक क्षेत्रका रूपमा चिनाएको थियो।
हालको निर्वाचनमा बारा क्षेत्र नं. १ बाट विभिन्न दलका प्रभावशाली नेताहरू प्रतिस्पर्धामा उत्रिने देखिएका छन्। नेकपा एमालेबाट केन्द्रीय सदस्य तथा पूर्व प्रतिनिधिसभा सदस्य अच्युत प्रसाद मैनाली उम्मेदवारका रूपमा अघि आएका छन्। मैनाली हाल विघटित प्रतिनिधिसभाका सदस्यसमेत हुन्।
त्यस्तै, नेपाल कम्युनिष्ट पार्टीबाट निजगढ नगर अध्यक्ष सन्तोष दंगाल पनि प्रतिस्पर्धामा रहेका छन्। राष्ट्रिय स्वतन्त्र पार्टीबाट भने समाचार तयार पार्दासम्म गणेश धिमाल र व्यवसायी ऋषि बढालको नाम चर्चामा रहेको छ।
समग्रमा हेर्दा बारा क्षेत्र नं. १ मा नेपाली कांग्रेसका उम्मेदवार शम्भु बहादुर बुढाथोकी र नेकपा एमालेका उम्मेदवार अच्युत प्रसाद मैनालीबीच मुख्य प्रतिस्पर्धा हुने राजनीतिक विश्लेषकहरूको अनुमान छ। निर्वाचन मिति नजिकिँदै जाँदा बारा क्षेत्र नं. १ जिल्लाकै सबैभन्दा चासोको केन्द्र बनेको छ।
