बारा : आर्थिक रूपमा कमजोर तथा विपन्न महिलालाई आत्मनिर्भर बनाउने लक्ष्यसहित लुमन्तिले जीतपुरसिमरा उपमहानगरपालिकामा बचत तथा आर्थिक सशक्तीकरणसम्बन्धी कार्यक्रमहरू सञ्चालन गरिरहेको छ। विशेषगरी दलित तथा विपन्न समुदायका घर–घरमा पुगेर महिलालाई बचत गर्ने बानी विकास गराउनुका साथै आयआर्जनका सम्भावनाबारे सचेतना फैलाउने काम भइरहेको छ।
कार्यक्रमअन्तर्गत उपमहानगरपालिकाका विभिन्न वडाका महिलाहरूलाई समूहमा संगठित गरी तालिममार्फत आर्थिक हिसाब–किताब राख्ने, बचत गर्ने र साना आर्थिक क्रियाकलाप सञ्चालन गर्ने सीप सिकाइँदै आएको छ। यसले महिलाहरूलाई आर्थिक रूपमा सक्षम बनाउँदै आत्मनिर्भर जीवनतर्फ अघि बढ्न प्रेरित गरिरहेको छ।
कार्यक्रमका कार्यक्षेत्र संयोजक इन्जिनियर अब्दुल कैसका अनुसार महिलाहरूलाई सहकारीको अवधारणा, यसको महत्व र सञ्चालन प्रक्रियाबारे निरन्तर अभिमुखीकरण गरिँदैछ। “विपन्न महिलाहरू आफैं नेतृत्वमा आउने र आफ्नै सहकारी सञ्चालन गर्ने वातावरण बनाउनु हाम्रो मुख्य लक्ष्य हो,” उनले बताए।
उनका अनुसार हालसम्म करिब ५ सय महिलाहरू यस अभियानमा आबद्ध भइसकेका छन्। उनीहरूलाई सहकारीमार्फत आर्थिक गतिविधि कसरी सञ्चालन गर्ने भन्नेबारे व्यवहारिक ज्ञान दिइँदैछ। आवश्यक तयारी पूरा भएपछि सहकारी ऐनअनुसार महिलाहरूको नेतृत्व र स्वामित्वमा सहकारी स्थापना गर्ने योजना रहेको उनले जानकारी दिए।
लुमन्तिले यसअघि पनि यस्ता पहलमार्फत सहकारी स्थापना गरिसकेको छ। संस्थाले १२ वर्षअघि बाराको कलैयामा र १८ वर्षअघि पर्साको वीरगञ्जमा सहकारी स्थापना गरी सफल अभ्यास प्रस्तुत गरिसकेको अनुभव रहेको जनाएको छ।
यससँगै लुमन्तिले स्थानीय तहसँगको सहकार्यमा वातावरणमैत्री बाँसका घर निर्माण गर्ने परियोजना पनि सञ्चालन गर्दै आएको छ। यसले आर्थिक रूपमा कमजोर तथा पछाडि परेका समुदायलाई सुरक्षित आवाससँगै सामाजिक र आर्थिक रूपमा सशक्त बनाउने लक्ष्य राखेको छ।
समग्रमा, लुमन्तिको यो अभियानले महिलाहरूलाई केवल बचत गर्न सिकाउने मात्र नभई आत्मविश्वास, नेतृत्व क्षमता र आर्थिक स्वतन्त्रता हासिल गर्न प्रेरित गरिरहेको छ, जसले दीर्घकालीन रूपमा समुदायको समग्र विकासमा योगदान पुर्याउने अपेक्षा गरिएको छ।
