कलैया — बारा जिल्ला मा यही फागुन २१ गते हुने प्रतिनिधिसभा सदस्य निर्वाचनलाई लक्षित गर्दै सुरक्षा व्यवस्था अत्यन्त कडा पारिएको छ।
निर्वाचनलाई शान्तिपूर्ण र सुरक्षित रूपमा सम्पन्न गराउने उद्देश्यले नेपाली सेना ले जिल्लाका विभिन्न स्थानहरूमा बख्तरबन्द गाडीमार्फत गस्ती सुरु गरेको छ। सेनाको सक्रिय उपस्थितिले सम्भावित जोखिम न्यूनीकरण गर्न मद्दत पुग्ने विश्वास गरिएको छ।
निर्वाचनको समयमा हुन सक्ने अवाञ्छित गतिविधिहरूलाई नियन्त्रणमा लिन र आम नागरिकलाई सुरक्षाको अनुभूति गराउन सेनाले आफ्नो परिचालन बढाएको हो। विशेषगरी मुख्य व्यापारिक केन्द्र, राजमार्ग तथा ग्रामीण क्षेत्रहरूमा सुरक्षा निगरानी थप कडा बनाइएको छ।
यसैबीच, नेपाल प्रहरी र सशस्त्र प्रहरी बल नेपाल सँगको सहकार्यमा चारै निर्वाचन क्षेत्रमा संयुक्त गस्ती सञ्चालन भइरहेको छ।
तीनै सुरक्षा निकायको समन्वयले जिल्लामा सुरक्षा व्यवस्था मजबुत बनाइएको छ, जसले निर्वाचनलाई निष्पक्ष, भयरहित र व्यवस्थित रूपमा सम्पन्न गराउने अपेक्षा गरिएको छ।
