बारा: बारा जिल्लाको निर्वाचन क्षेत्र नं. ४ मा भएको प्रतिनिधिसभा निर्वाचनले रोचक तर कडा परिणाम दिएको छ। कुल ३७ उम्मेदवार प्रतिस्पर्धामा उत्रिएको यो क्षेत्रमा अधिकांशले अपेक्षित मत ल्याउन नसक्दा जमानत गुमाउनु परेको छ।
निर्वाचन निर्देशिका २०८२ अनुसार सदर मतको कम्तीमा १० प्रतिशत मत ल्याउन नसक्ने उम्मेदवारको जमानत जफत हुने व्यवस्था छ। यही नियमका कारण ३७ मध्ये ३४ उम्मेदवारले आफ्नो जमानत जोगाउन सकेनन्।
यो निर्वाचनमा १८ जना विभिन्न राजनीतिक दलका उम्मेदवार थिए भने १९ जना स्वतन्त्र रूपमा मैदानमा उत्रिएका थिए। तर अन्तिम मतपरिणामले देखायो कि केवल तीन उम्मेदवारले मात्र मतदाताको विश्वास जित्दै आवश्यक मत कटाउन सफल भए। राष्ट्रिय स्वतन्त्र पार्टीका रहबर अंसारी, नेकपा एमालेका कृष्णकुमार श्रेष्ठ (किसान) र जसपा नेपालका सन्जु साह कानुले मात्र आफ्नो जमानत सुरक्षित राख्न सके।
कुल खसेको ८०,६७८ मतमध्ये ७४,६३७ मत सदर भएको थियो। जमानत जोगाउन कम्तीमा ७,४६४ मत आवश्यक थियो। तर धेरै उम्मेदवारले यो सीमा पार गर्न सकेनन्। नेपाली कांग्रेसका उम्मेदवार श्यामबाबु गुप्ताले ७,११३ मत प्राप्त गरे पनि आवश्यक मत नपुग्दा उनको पनि जमानत जफत भयो।
अन्य उम्मेदवारहरूको अवस्था झन् कमजोर देखियो। कसैले दुई हजारभन्दा कम, त कसैले सयौं मत मात्र प्राप्त गरे। यसले बारा–४ मा मतदाताको समर्थन केही सीमित उम्मेदवारमा केन्द्रित भएको स्पष्ट देखाएको छ।
निर्वाचन अधिकृत गम्भीर घिमिरेका अनुसार आवश्यक मत नपुग्दा तीन जना बाहेक सबै उम्मेदवारको जमानत जफत भएको हो। यस परिणामले आगामी निर्वाचनमा उम्मेदवार छनोट र रणनीतिमा दलहरूलाई गम्भीर सोच्न बाध्य बनाउने देखिएको छ।
