राहुल सिंह/जीतपुर : बाराको जीतपुर–सिमरा उपमहानगरपालिका वडा नं. ६ मा नवनिर्मित सुविधा सम्पन्न वडा कार्यालय भवन उद्घाटन गरिएको छ। आफ्नै भवनबाट सेवा दिन थालेसँगै अब स्थानीयवासीले थप सहज र व्यवस्थित सेवा पाउने अपेक्षा गरिएको छ।
करिब ६० लाख रुपैयाँको लागतमा निर्माण सम्पन्न उक्त भवनको उद्घाटन प्रदेश सभा सदस्य देवनारायण चौधरी र नगर प्रमुख राजन पौडेलले संयुक्त रूपमा गरेका हुन्। वडा अध्यक्ष कैमुदिन अंसारीको अध्यक्षतामा सम्पन्न कार्यक्रममा जनप्रतिनिधि, कर्मचारी र स्थानीयवासीहरूको उल्लेख्य सहभागिता रहेको थियो।
यसअघि भाडाको घरबाट सञ्चालन हुँदै आएको वडा कार्यालय अब आफ्नै भवनमा सरेको हो। नयाँ भवनमा पाँच वटा कोठा, एक भान्सा कोठा र महिला–पुरुषका लागि छुट्टाछुट्टै शौचालयको व्यवस्था गरिएको छ, जसले सेवाग्राहीलाई थप सहजता दिने विश्वास गरिएको छ।
भवन निर्माणका लागि आवश्यक एक कठ्ठा ५ धुर जग्गा वीरगञ्ज महानगरपालिका–१४, बहुवरी पर्साका बदरुल होदा अंसारी र समिम रेयाज अंसारीले उपलब्ध गराएका थिए। उनीहरूको योगदानको कदर गर्दै कार्यक्रममा दोसल्ला ओढाएर सम्मान तथा कदरपत्र प्रदान गरिएको वडा अध्यक्ष अंसारीले जानकारी दिए।
कार्यक्रममा उपमहानगरपालिकाका उपप्रमुख भोला प्रसाद अधिकारी र प्रमुख प्रशासकीय अधिकृत डमरु निरौलाको समेत विशेष उपस्थिति रहेको थियो। करिब एक वर्षको अवधिमा निर्माण सम्पन्न भएको यो भवन अब वडा कार्यालयको सेवा प्रवाहलाई अझ प्रभावकारी बनाउने अपेक्षा गरिएको छ।
