कलैया, बाराः बारामा अनधिकृत रूपमा विद्युत चोरी गरी सिँचाइमा प्रयोग गरिएका ७ थान विद्युत मोटर नियन्त्रणमा लिइएको छ। नेपाल विद्युत प्राधिकरण कलैया वितरण केन्द्र र सुरक्षाकर्मीको संयुक्त टोलीले सञ्चालन गरेको विद्युत चुहावट नियन्त्रण अभियान अन्तर्गत मंगलबार विभिन्न स्थानबाट ती मोटरहरू बरामद गरिएको हो।
कलैया वितरण केन्द्रका सुपरभाइजर दिपेन्द्र कुमार साहका अनुसार नियन्त्रणमा लिइएका सामग्रीमध्ये १ एच.पी.का ५ थान र २ एच.पी.का २ थान सिँचाइ मोटर रहेका छन्। यसका साथै १ थान पंखा, १ थान स्पिकर र १ थान फर्निचर मेसिन समेत बरामद गरिएको छ, जुन विद्युत चोरीमार्फत सञ्चालनमा रहेको पाइएको थियो।
प्राधिकरणले बरामद गरिएका उपकरणका धनीहरूलाई सम्पर्कमा आउन आह्वान गरेको छ। यदि सम्बन्धित व्यक्ति सम्पर्कमा आएमा कानुनी प्रक्रिया अनुसार जरिवाना तिराएर सामग्री फिर्ता गरिने, अन्यथा ती सबै सामग्री जफत गरिने चेतावनी दिइएको छ।
पछिल्लो समय कृषि र साना उद्योगका नाममा विद्युत चोरी बढ्दै गएको गुनासो आएपछि प्राधिकरणले यस्तो अभियानलाई थप कडाइका साथ सञ्चालन गर्ने जनाएको छ। यस अभियानले विद्युत चुहावट नियन्त्रण गर्दै नियमित आपूर्ति सुधार र राजस्व संरक्षणमा सहयोग पुग्ने अपेक्षा गरिएको छ।
