सिमरा : नेपाल अपाङ्ग सेवा संघ बारा शाखाको ८औँ अधिवेशन तथा २४औँ साधारणसभा सिमरामा भव्य रूपमा सम्पन्न भएको छ। संघको सभाहलमा आयोजित कार्यक्रमको उद्घाटन जीतपुरसिमरा उपमहानगरपालिकाका उपप्रमुख भोला प्रसाद अधिकारीले गर्नुभएको हो।
कार्यक्रममा नेपाल अपाङ्ग सेवा संघ बाराका अध्यक्ष गंगा प्रसाद वाग्लेले अपाङ्गता भएका व्यक्तिहरूलाई समाजको मूलधारमा ल्याउन सबै पक्षको सहकार्य आवश्यक रहेकोमा जोड दिनुभयो। उहाँले संघले विगतदेखि नै शिक्षा, सीप विकास, सामाजिक न्याय तथा अधिकार सुनिश्चितताका क्षेत्रमा निरन्तर काम गर्दै आएको बताउँदै आगामी दिनमा अझ प्रभावकारी कार्यक्रम सञ्चालन गरिने प्रतिबद्धता व्यक्त गर्नुभयो।
साधारणसभाले आर्थिक तथा प्रगति प्रतिवेदन पारित गरेको छ। कार्यक्रममा जिल्लाभरिका सदस्य, समाजसेवी, जनप्रतिनिधि तथा विभिन्न संघसंस्थाका प्रतिनिधिहरूको उल्लेखनीय उपस्थिति रहेको थियो।
त्यसैगरी सदस्यहरूमा प्रमोद प्रसाद राय, गोदावरी कुमारी साह, उद्धव घिमिरे, रमेश लामिछाने लगायत चयन भएका छन्। नयाँ कार्यसमितिले अपाङ्गता भएका व्यक्तिहरूको हक, हित, संरक्षण तथा सशक्तिकरणका क्षेत्रमा अझ सक्रिय भएर काम गर्ने प्रतिबद्धता जनाएको छ।
निर्वाचन प्रक्रियालाई निष्पक्ष, पारदर्शी र व्यवस्थित बनाउन जय प्रकाश रायको संयोजकत्वमा पाँच सदस्यीय निर्वाचन समिति गठन गरिएको थियो। समितिमा सीताराम पराजुली, रञ्जन यादव, शुकदेव सिम्खडा र शुशीला गौतम सदस्य रहेका थिए।
नयाँ कार्यसमितिको पदावधि तीन वर्षको रहनेछ। साथै कार्यसमिति बैठकले दुई जना सदस्य मनोनयन गर्न सक्ने प्रावधान पनि रहेको छ। कार्यक्रम सौहार्दपूर्ण वातावरणमा सम्पन्न भएको आयोजकले जनाएको छ।
