रौतहट:रौतहटको चन्द्रपुरमा सामान्य विवादका क्रममा धक्का लागेर घाइते भएका एक युवकको उपचार अभावमै मृत्यु भएको छ। घटनामा संलग्न रहेको आरोपमा प्रहरीले एक जनालाई पक्राउ गरेको छ।
जिल्ला प्रहरी कार्यालय रौतहटका अनुसार चन्द्रपुर नगरपालिका–४ निवासी ३० वर्षीय विष्णु सुवेदीको गएराति मृत्यु भएको हो। घटनामा संलग्न रहेको आरोपमा बाराको निजगढ नगरपालिका–६ का ३८ वर्षीय विमल मोक्तानलाई प्रहरीले नियन्त्रणमा लिएको जनाएको छ।
प्रहरीका अनुसार मोक्तान मदिरा सेवन गरी श्रीमतीसँग सडकमा झगडा गरिरहेका बेला त्यहाँबाट हिँडिरहेका सुवेदीसँग सामान्य भनाभन भएको थियो। विवादकै क्रममा मोक्तानले सुवेदीलाई जोडले धकेलेका थिए। धक्कापछि सडकमा पछारिएका सुवेदी गम्भीर घाइते भएका थिए।
घटनापछि स्थानीयवासीले तत्काल उनलाई चन्द्रनिगाहपुरस्थित रिसरेखा अस्पताल पुर्याएका थिए। प्रारम्भिक उपचारपछि चिकित्सकले अवस्था गम्भीर रहेको भन्दै थप उपचारका लागि सुविधासम्पन्न अस्पताल लैजान सुझाव दिएका थिए।
तर परिवारको कमजोर आर्थिक अवस्थाका कारण उनलाई थप उपचारका लागि अन्यत्र लैजान नसकिएको र घरमै फर्काइएको बताइएको छ। घर फर्किएको केही घण्टापछि सुवेदीको मृत्यु भएको प्रहरीले जनाएको छ।
एक सामान्य विवादले ज्यानै जाने दुःखद घटनाले स्थानीय समुदायलाई स्तब्ध बनाएको छ। आर्थिक अभावका कारण समयमै उपचार नपाउँदा एक युवा जीवन गुम्न पुगेको भन्दै स्थानीयवासीले दुःख व्यक्त गरेका छन्।
प्रहरीले घटनामा संलग्न मोक्तानलाई नियन्त्रणमा लिएर थप अनुसन्धान अघि बढाएको जनाएको छ।
.gif)
