रामबन : विश्व वातावरण दिवसको अवसरमा वातावरण संरक्षण, हरियाली प्रवर्द्धन तथा समुदायमा वातावरणीय चेतना अभिवृद्धि गर्ने उद्देश्यले रामबनस्थित पिकनिक पार्क क्षेत्रमा वृहत् वृक्षारोपण कार्यक्रम सम्पन्न गरिएको छ। जनकल्याण मध्यवर्ती बचत तथा ऋण सहकारी संस्था (साकोस) र जनहित उपभोक्ता समितिको संयुक्त आयोजनामा सम्पन्न उक्त कार्यक्रममा विभिन्न जातका ३०० बिरुवा रोपिएको छ।
जनजागरण मध्यवर्ती सामुदायिक वन उपभोक्ता समूह, रामबनको पिकनिक पार्क क्षेत्रमा आयोजित कार्यक्रममा स्थानीय जनप्रतिनिधि, सहकारीकर्मी, वन उपभोक्ता समूहका सदस्य तथा विभिन्न सामाजिक संघसंस्थाका प्रतिनिधिहरूको उल्लेखनीय सहभागिता रहेको थियो। वातावरणीय सन्तुलन कायम राख्न र बढ्दो जलवायु परिवर्तनका चुनौतीसँग जुध्न वृक्षारोपण प्रभावकारी माध्यम भएको भन्दै सहभागीहरूले यस्ता अभियानलाई निरन्तरता दिनुपर्नेमा जोड दिएका थिए।
कार्यक्रम जनकल्याण मध्यवर्ती साकोसका अध्यक्ष श्री अमृतलाल श्रेष्ठको सभाध्यक्षतामा सम्पन्न भएको थियो। कार्यक्रममा माननीय देवनारायण चौधरी प्रमुख अतिथिका रूपमा उपस्थित रहनुभएको थियो। प्रमुख अतिथि चौधरीले वातावरण संरक्षण कुनै एक संस्था वा व्यक्तिको मात्र जिम्मेवारी नभई सम्पूर्ण समाजको साझा दायित्व भएको उल्लेख गर्दै वृक्षारोपणलाई व्यवहारिक रूपमा कार्यान्वयन गर्नुपर्ने आवश्यकता औंल्याउनुभयो। उहाँले रोपिएका बिरुवाको संरक्षण र नियमित हेरचाह गर्न सके मात्र यस्ता अभियानले सार्थकता पाउने बताउनुभयो।
कार्यक्रममा जनहित उपभोक्ता समिति, जनकल्याण साकोस, राधाकृष्ण, भीमेश्वर, मुसहरनिमाई तथा जनजागरण सामुदायिक वनका सदस्यहरूको सक्रिय सहभागिता रहेको थियो। सहभागीहरूले सामूहिक रूपमा विभिन्न प्रजातिका बिरुवा रोप्दै वातावरण संरक्षणप्रति आफ्नो प्रतिबद्धता व्यक्त गरेका थिए।
कार्यक्रमको प्रारम्भमा श्रीमती निरु बगगाई अधिकारीले स्वागत मन्तव्य व्यक्त गर्दै विश्व वातावरण दिवसको महत्वबारे प्रकाश पार्नुभएको थियो। उहाँले प्रकृतिको संरक्षण र वातावरणीय सन्तुलन कायम राख्न प्रत्येक नागरिक सचेत र जिम्मेवार हुनुपर्ने बताउनुभयो। पछिल्लो समय बढ्दो वन विनाश, प्रदूषण र जलवायु परिवर्तनका असरलाई न्यूनीकरण गर्न वृक्षारोपण अभियान महत्वपूर्ण कदम हुने उहाँको भनाइ थियो।
त्यसैगरी कार्यक्रम सञ्चालन श्री रबिन्द्र खकुरेलले गर्नुभएको थियो। उहाँले कार्यक्रमका विभिन्न चरणहरू सञ्चालन गर्दै सहभागीहरूलाई वातावरण संरक्षणका गतिविधिमा निरन्तर जोडिन आग्रह गर्नुभयो।
वृक्षारोपण कार्यक्रममा रोपिएका बिरुवाले आगामी दिनमा पिकनिक पार्क क्षेत्रलाई थप हराभरा र आकर्षक बनाउनुका साथै जैविक विविधता संरक्षण, माटो कटान नियन्त्रण तथा स्वच्छ वातावरण निर्माणमा समेत महत्वपूर्ण योगदान पुर्याउने विश्वास व्यक्त गरिएको छ। स्थानीयवासीहरूले पनि यस्ता कार्यक्रमले समुदायमा वातावरणप्रति सकारात्मक सन्देश प्रवाह गर्ने र नयाँ पुस्तालाई प्रकृतिप्रति जिम्मेवार बन्न प्रेरित गर्ने बताएका छन्।
विश्व वातावरण दिवसको अवसरमा आयोजित उक्त कार्यक्रमले वातावरण संरक्षणप्रति स्थानीय समुदायको चासो र प्रतिबद्धतालाई थप बलियो बनाएको सहभागीहरूको भनाइ रहेको छ। वृक्षारोपणसँगै बिरुवाको संरक्षण र व्यवस्थापनमा समेत सबै पक्षले ध्यान दिनुपर्ने प्रतिबद्धता व्यक्त गर्दै कार्यक्रम सम्पन्न भएको थियो।
.gif)
